John Obi Mikel oo heshiis cusub oo 5-sano ah u saxiixay Chelsea FC

(London), 05 December 2012

Kooxda Kubadda Cagta Chelsea FC ee dalka Ingiriiska ayaa shaaca ka qaadday in ay heshiis cusub oo 5-sano ah ka saxiixatay maanta xidiggeeda Khadka dhexe ee Reer Nigeria John Obi Mikel, taasoo Obi uu kula sii joogo doono illaa 2017-ka.

Warkan ayaa lagu soo bandhigay Bogga Internet-ka ay ku leedahay kooxda (The Blues), waxaana Obi Mikel oo 25-jir ah uu Chelsea u saftay 261-kulan, waxaana kooxdiisa kula guuleystay Koobka Horyaallada Yurub 1-jeer, Koobka FA-ga Ingiriiska 4-jeer, Horyaalka Ingiriiska 1-mar iyo Carling Cup 1-jeer.

“Wax walba waan kula guuleystay Chelsea sanadihii macaanaa ee aan la ciyaarayay, sharaf ayayna ii tahay in aan la ciyaaray laacibiin waaweyn sida Didier Drogba, John Terry iyo Frank Lampard” ayuu bogga Mikel u sheegay Bogga kooxdiisa Chelsea.

Mikel Obi waxa uu sheegay in uu rajaynayo in 5-sano ee soo socotana uu Koobab kale kula guuleysan doono kooxdiisa Chelsea oo uu ku soo biiray isagoo 19-jir ah sanadkii 2006-dii.

GOOL FM

Comments

comments