Chelsea oo 160-Milyan Euro u soo bandhigtay Tababare Pep Guardiola

Published on December 11, 2012 by Yahye

(ESPN), 11 December 2012

Warar saakay oo Talaado ah soo baxay ayaa sheegaya in kooxda Kubadda Cagta Chelsea ee dalka Ingiriiska ay lacag aan caqli gal ahayn ay u soo bandhigtay tababaraha Shaqa la’aanta ah ee Pep Guardiola si ay ula soo wareegto xilli ciyaareedka soo socda.

Shabakadda ‘ESPN’ ayaa sheegtay in Maalqabeenka Milkiilaha ka ah kooxda Chelsea Roman Abramovic uu u soo bandhigay Guardiola heshiis 4-sano ah iyo Mushaar dhan 32-Milyan oo Euro sanadkiiba, iyadoo mushaarka 4-taasi sano marka la isku darana uu noqonayo 128-Milyan oo Euro.

Abramovic intaasi kuma ekaanine waxa uu Guardiola siin doonaa lacago kale oo ka baxsan mushaarkiisa sida haddii uu Koobab ku guuleysto, waxaana marka lagu daro lacagahaasi abaalmarinnada ah ay xisaabtu isku noqonaysaa 160-Milyan oo Euro.

Sababaha uu Roman Abramovic sidan u yeelayo ayaa lagu tilmaamay sidii uu isbaarro ugu dhigi lahaa kooxaha daba jooga tababarahan ee doonaya in ay la wareegaan sida kooxda Paris Saint-Germain ee dalka Faransiiska, Machester City ee dalka Ingiriiska iyo Bayer Munich oo iyana ka dhisan Jarmalka.

Dhinaca kale Wakiilka tababarihii hore ee Barcelona Jose Maria ayaa saxaafadda u sheegay in Guardiola uusan weli wax go’aan ah ka gaarin mustaqbalkiisa ku aaddan xilli ciyaareedka soo socda.

GOOL FM